Please click~~~

10/21/2012

灣仔露營遊

星期六一早聽收音機,有獵戶座流星雨,雖然 PEAK 係今日(即係 10月21日),但好似前後幾日都有少少,抽起條筋出發去露營睇星~

上次去完塔門已經密謀第二次露營遊,上網搜尋日輪話西貢灣仔營地有水有廁所好方便咁,有人話灣仔可以睇星,於是今次決定試去呢個新營地。

船到了,上船去也。船艙其實唔大,撞啱有班露營團,轉眼間隻船爆滿了。由於全船都係露營遊,個個都帶好多裝備,就算人數上冇超載,計重量都好勁... 朋友話:睇定救生衣响邊... 好彩無驚無險,十幾分鐘就到了:

一上岸就到左南營,我地四點幾到,已經一地都係營:


由於海邊位所餘無幾,與朋友去左營外少少既位,但都响海邊,好似森林咁,好舒服。揾好營地,由於我地既 ‘原裝’ 營釘太弱了,所以用左好多時間做固定。反正唔趕時間,一於慢慢來。轉眼差唔多日落。

欄內就係真正既營地,好多人好厲害,好似成間屋搬左黎咁,有枱有櫈,唔少人仲執柴生火,好似好有風味咁﹣

仲有人拎瓦煲去整煲仔飯...

呢個營有少量枱櫈,一早被人霸晒:

灣仔有南西兩營,出左呢個門牌:

行十幾分鐘就到西營。門口既大垃圾桶,據聞都係為左防止啲牛入左營地而放,但大家為左方便都冇拉番好佢:

西營面積比南營大,比較多團體聚集,人比較少,只係冇左海景:

一堆一色一樣既營,都係來自同一個露營公司:

番到南營,水喉設施都 OK 多位都乾淨:

呢個簡直係豪華營,門口位對入有枱有櫈,好似屋企咁架:

我地呢啲初階露營者,今次仲失敗到拎少左粒電,用倒燈用唔倒電筒,全晚靠呢盞小燈為生。好彩呢個世界既電話可以扮電筒用  ^.^

從營內望出去,咩都見唔倒... 只有盞燈... 

冇燈既世界,感受倒久違了伸手不見五指既感覺,只有海浪聲,風聲,寧靜...

月亮下山前秒殺~


晚間活動,有人食晚不停食,有燒烤,打邊爐,有人選擇吹吓水,玩集體遊戲,各式其式。有人決定放火... 營火是也:

我就決定去睇星星... 好彩尋晚天清,肉眼睇成天都係星,好靚。相機影出黎變左另一回事。令我諗番起上次睇到好靚既埃及星空....

越夜,星星好似越光,等左一陣都冇流星出現,番營瞓响到等,等呀等.. 等到瞓著左... 突然有人大叫,流星呀,但我聽到時流星已過... 決定去瞓覺算數,番正睇到咁多星已經好開心:

第二朝好多人一早就醒左,好熱鬧,加上太陽出來了,漸漸變得好熱,起身梳洗一輪,食個早餐收拾一下就準備離開。呢個營附有個小沙灘,唔少人都趁水退去摸蜆,收穫都幾豐富。仲有好多人去釣魚,成功加餸。

第二次露營完滿結束,由於太急要出發,帶漏少少野,但都冇咩問題既。露營好似會上    癮咁,見人地有咩,心會諗,有都好喎;但諗落又要拎咁多野就有少少打退堂鼓。今次已經比  上次多加了睡蓆同水袋,但想有個滿圓既露營,相信要慢慢研究同儲裝備。

市面上露品實在太五花八門,唔想買左先發覺唔啱駛,搞到呢期勁上網做 research,但又幾好話喎~買倒樣好用又平既野,就想快啲拎去露營實地試用吓,試用完係好既又好開心。

話時話,上期提到既 LED 燈,今次露營見倒有人用,口痕問下用緊既人,大家都好樂意提供資料,原來好多都係某啲露營網既網友,志同道合,好高興喔~

同場加映:於黄石碼頭試玩 iphone5 內置 Panorama 功能,都 OK 咁喎。輯相除左呢張都係 Canon S95 拍的~




6 comments:

  1. hehe, 少少中毒啦,體驗不一樣的生活 :P 你都鍾意露營?

    雙子座流星雨,好似好吸引喎~

    ReplyDelete
  2. 你估中左勒,我呢期成日去‘上山下海’ 睇野~

    ReplyDelete
  3. 多謝條 LINK 呀~ campsaver 都有睇過吓,但驚泥足深陷,唔敢細睇 :P

    灣仔睇過吓可以小巴再行入去,但懶,所以搭船又快又方便 ^.^

    ReplyDelete
  4. 我好間中先去行山的,你通常行邊頭?

    ReplyDelete