Please click~~~

3/31/2012

Escape Game: Obstructed Love 受阻礙的愛情 (USD1.99)

收倒個 email 問關於呢個 game. 遊戲係另一個 Gotmail 發展出既遊戲,當中有兩個之前出過既免費遊戲,但完成一次之後想再玩要再比 USD1.99,有冇搞錯!!!

故事好簡單,主角暗戀一個女同學,女同學前男友得知讓女同學都鍾意主角,為左拆散佢地引主角去間房諗住令佢錯失表白機會... 白痴兼幼稚.

遊戲中個六角形膠板提示好煩好誤導,試左好耐先搞明佢個唔清唔楚既提示,其他都 OK的,唔太難玩的一個。

Download Link: http://itunes.apple.com/hk/app/escape-game/id501019207?mt=8





3/26/2012

第四屆特首 ﹣ XXX 先生

以下純為個人感想,不喜勿看:

近期 facebook, 微博等等極速被洗版,都係有關特首新聞,坦白講,投票前一日基本上已經塵埃落定,唐XX先生定梁XX先生當選又如何?大致上香港既命運都响中國政府操控中。一日中國政府覺得香港仲有價值,一日都唔會整死香港,所謂既特首,咪又係一直只係個中介人角色,傳聲筒,橡皮圖章。難道佢真係有能力發自內心為港人服務,可以唔比四圍起勢咁加價?

茅頭一直指向梁先生既暗紅背景,驚中共操控香港。問心而論,就算特首冇任何中共背景係咪就可以自己話事唔駛聽中央支笛?今次如果流選,邊個仲敢出黎選?邊個出黎選一定會比而家呢兩個更好?如果個個都有投票權,係咪又真係個個都會去投票?投出黎既又一定有能耐,肯担當,又果斷英明?

個人偏向相信時勢做英雄,今時今日又有多少英雄能做時勢?誠如美國總統奧巴馬,上任時民望幾高,大眾期望有多高,不見得所做一切就盡得人心,人人皆讚。

或許,唐先生個人運氣太好,天注定佢繼續做個開心有錢人,飲飲紅酒嘆嘆世界,唔駛做特首做箭靶;或者,香港需要個強勢政府,唔係比市民嘈嘈吓唔經大腦周街每人派六千蚊;也許,香港商人治港時代要告一段落,要變一下,樓價有機會回落一下令大眾市民可以有機會做樓奴;難道,個個不停鬧會鬧得走佢? 唔通,facebook/ 微博爆板結果會唔同左?又或者要個個人都走去移民,離開香港?但係,邊度先係真正既安樂窩?

當一切都唔响我地掌握,唔可以改變既時侯,不如少啲怨氣,少啲投訴,發放多啲正能量,祈願香港保持做一塊福地,明天會更好! 好好活在當下,活好自己既每一日罷啦~

Movie: 春嬌與志明 Love in the Puff ﹣i n 55!w!﹣

笑位唔少,睇得輕鬆:
﹣去完老蘭要去翠華,點解?唔係點知你嗰件係螞蟻上樹... 超賤但爆笑~
﹣黄曉明,鄭伊健,黄馨平客串 - 針針到肉
﹣一開頭劏豬櫈既故事,簡直繼承左上一集停車場鬼故事一樣 - 無厘頭得黎又好入腦 :P
﹣仍然有我鍾意既馬桶乾冰

雖然背景搬左去北京,但成個環境氣氛都 OK,唔會比人覺得個人鐘意呢集多過上一集,雖然粗口一樣多,但唔知點解一爆粗啲人就笑... 奇...

其中一段.... 春嬌話:我好努力去擺脫張志明,最後我發覺,我變左另外一個張志明.... 突然有啲心酸... 笑中有淚

個人幾 like 的一套戲~

去戲院睇的話,記得一定一定要睇片尾 ^O^





3/25/2012

Movie: The Hunger Games 飢餓遊戲

雷聲大雨點小的電影,內容好簡單,故事中國家的 12 個地區每年貢獻出12﹣18歲的童男童女各一名去首都參加一場大逃殺,24 人中只會有一名生還者,從此衣食無憂。主角 Katniss 妹妹被選中,Katniss 主願代妹做貢品,Katniss 後來與同區被選中之男對手日久生情,一同勝出比賽光榮回歸十二區,但故事似乎尚未完結...


成套戲二個半鐘左右,頭十分鐘搖來搖去既畫面令我好暈... 為左令人明白成個遊戲由來,好多對面,重重覆覆;女主角唔係十分之靚,十二區森林男性朋友明顯比一齊參加飢餓遊戲既 Peeta 吸引;Peeta 由頭到尾都令我覺得佢係奸既,遊戲中途佢參加左個 alliance 去追捕 Katniss 但後來 Katniss 點解唔追究佢反而信佢,救佢仲鐘意埋佢... 真係好謎!!要睇殺人,大逃殺豐富好多;想睇愛情故事,呢套戲又點到即止,有得於冇;前段戲強調 sponsor 好重要 - 原來就只送出一罐刀傷藥.... 

成套戲又唔係無可取之處,首都都民既奇裝異服都幾靚... 特技方面, 森林‘人造火’同臨時加三隻怪獸為左加快完場都 OK,其他真係唔多諗倒... 

3/22/2012

WaveA: Geisha House (Free)

AppNavi 繼昨天的免費遊戲 Mask 後第二日再有新 game. AppNavi 內置遊戲內,上方 banner 顯示之外掛連結遊戲,developer 由 AppNavi 改成 WaveA, 同樣由 Gotmail 推出的, 遊戲模式同 AppNavi 一向的差不多。

在京都做藝妓的主角,去宴會前睡著了,醒來發現得番自己一個於屋內,其他人都離開了,屋內發現字條,原來另一藝妓有心令佢出唔倒場表演...

Jessie 提醒,結局有兩個:
好結局:用繩縛好和服,成功逃出,趕得及去到表演,困住主角個藝妓激死左
壞結局:主角冇縛好和服,逃出時於繩梯跌下,傷了腳,冇得出表演

簡單的一個遊戲,但勁討厭個紅色砌圖版,好慢,同埋個衣櫃成日按錯 >.<




Download link: http://itunes.apple.com/hk/app/escape-geisha-house/id510579757?mt=8



**7429 的註解,如圖上,一個圓點相連一條直線,左欄至中間一欄,每條線順時針轉 45度,至第右欄再順時間轉 45 度,每組點及線如此轉動,得出密碼:7429

3/21/2012

多事亂‘淘’之 迷你 Router (TP-Link TL-WR700N)

出差去旅行,去到有 wifi 既地方總忍唔住手去上網一下。前幾日走左去淘左個迷你 router (路由器),機身有插頭直接取電,另一邊糟位插入 lan 綫,得左~

想 set 密碼,只要响電腦改 IP,再上網輸入設定之 IP 地址,改好用戶名稱及密碼即可。唔用密碼既基本上即插線即用。

價錢連運費約 HKD120 一個,體積夠細,插個掣就可以用,有需要既可以考慮吓。

PS: 
1. 呢個 router 設計其實係 ‘抄考’ apple 系列既 Airport Express (市價好似係 HKD780),但呢個 TP LINK version 係兩個大陸頭,响香港或其他地區用要轉插頭的

2. 是次淘寶係以集運方式再連其他淘寶野運番香港的,未必間間舖都會送香港,要淘之前請問清楚賣家


Netvigator 之 customer service 篇

上星期四成功安裝香港寛頻後,星期五去了 PCCW 門市填份 netvigator service termination,職員表示終止日期理論上係一個月後,但會有同事同我再聯絡確定日期。順口問了之前隻免費送既上網手指駛唔駛還,係咪已經 cancel service, 得知要填另一份表,順手填埋。

隔了幾日,netvigator 冇消息幾時正式終止服務,於是打電話去問,有關職員表示門市填表要經另一部門入機,再由有關部門同我聯絡確定時間。中途職員話:其實想了解番點解你會終止服務呢?

我如實回答,幾個月來打黎問左幾次,貴公司都話30Mb服務最平都係 HKD238 一個月,冇免月費,冇 coupon, 人地公司標準價 100Mb都 HKD140 一個月, 你係我都轉啦

職員 9 秒 9  offer 了一個計劃,都係 HKD238 一個月但有幾個月回贈同幾百蚊超市現金 coupon, 平均 HKD18x 一個月....

其實我上次打去佢比呢個 offer 我既話我可能已經續左約,但佢呢個 offer 真係太遲了,我新約又簽了,線又整好晒,番唔倒轉頭。
******************************************

3 月 23 日更新:收到網上行客戶服務部電話,確定終止合約日期,職員問點解要終止,我話價錢問題,職員快速提供了一個 HKD17x 的月費計劃..... 正所謂低處未算低....  (*&@*!*XYZ!!!!!)

AppNavi: Mask (Free)

主角回家途中被車撞倒,有人救了,但醒來發現身在密室~

逃出期間,發現房中好多物品主角都曾經買過或者擁有過的,後來到車房,發現原來救命恩人就係撞佢既人,仲一直都跟蹤住佢...

遊戲本身唔錯,有邏輯唔難玩,不錯的一個 game~




3/18/2012

Movie: John Carter 異星爭霸戰:尊卡特傳奇

改篇自百年前小說 "A Princess of Mars",  以 Barsoom(覇爾森,即火星) 為故事主背景場地,有關美國內戰時期一名軍官 John Carter 因為戰爭失去家人,後來為左逃避戰爭,於一個山洞誤殺一名 Holy Therns 後莫名奇妙被送往火星。因為大氣密度不同,John Carter 去到火星變得力大如牛,身輕如燕,更戀上 Helium 公主,為救佳人挑戰 Thark 壞人領袖,再帶領一眾 Thark 族人打敗想一統覇爾森之  Zodanga 死蠢王子。




於 IMAX 3D 影院睇,結論係大畫面,感受倒 3D 既靚畫面,比一般既所謂 3D 好好多。套戲差不多 2.5 小時,劇情其實好易估,冇驚喜,中間有少少位拉長黎做,但整體都唔悶,只係奇怪地一邊睇呢套戲不停令我諗起好多唔關事既野:

Thark 族人令我諗起 亞凡達;John Carter 呢個名一聽令我諗起美國長篇劇 ER 既 Dr. John Carter;行得超快既火星可愛狗 Woola 好似 Alice in the Wonderland 隻可透明既貓;飛船好似天空之城出現過咁;公主造型好波斯王子感覺;Matai Shang (Therns) 光頭造型極似 Fringe 內之 observer + 幽遊白書中既冥界使者 (連外型 + 打扮都好似!!!)

3/17/2012

Tempur 太空枕

幾年前有失眠問題,瞓到半夜會札醒,醒左臨天光先瞓得番。同時睇中醫(骨醫)話我頸椎位唔正常,叫我換枕頭,可能太扁了。試過有人教墊高腳,飲熱鮮奶,對腳浸熱水先去瞓,睇中醫調理,甚至食安眠藥都試過晒,功效不大,於是向枕頭埋 手。(安眠藥食完第二日個口成日覺得好苦,精神唔好,儘量唔好試)

自此之後,幾年內轉了不下 8 個枕頭,目的只想瞓個好覺,當中由幾十蚊至過千都有。千揀萬試,揀到個最啱自已既  Tempur 太空枕,感覺係睡眠質素改善了,瞓醒肩頸冇左好‘緊’既感覺。

無程程講起呢個枕頭,皆因今日行過 九龍灣 PIAGO,發現呢個原價過千既枕頭做緊特價 HKD799... 我幾年前買用 HSBC 7 折時入手,好似都冇咁平呢~ 枕頭大概 06 年買的,至今都冇咩變型現像,應該可以用多幾年~

3/16/2012

酒店討厭事

因工作關係,間中都要出差住酒店,當中有好有唔好,本身冇潔癖既我,基本要求只係乾乾淨淨咁就可以,唔駛好豪好靚。

但唔知點解成日覺得酒店地氈好污糟,所以儘量唔會唔著鞋响房內行;多年前睇過一篇文章,提及全酒店房最污糟既就係 ‘搖控器’,睇完後呢概念一直留响我腦中,所以我亦唔會將搖控器放於床上,通常只放於電視前,打開揀完台就唔再郁佢。除此之外,個人住酒店 top 10 最怕既情況係:

1. 冇熱水沖涼,或者水唔夠熱,唔夠力
2. 房間隔音差,尤其係房近電梯口,不停聽見人聲,電梯開關聲
3. 房中成陣煙味,歷夠不散
4. 間房超大.... 特別得一個人住既時候,會覺得好恐怖架...
5. 空調夏天冷氣太凍,冬天又太熱,總之空調温度永遠處於不商當温度
6. 一入房周身唔自在 (咁要即換房),又式者入房見倒本聖經打開左 (真係見過架)
7. 房咭日日都壞, 日日都要去換一次房咭,對一次身份
8. 床槈太硬,枕頭太扁
9. 透明浴室(同人 share 房時超尷尬,一個人一間房時其實 OK)
10. 半夜有人打黎問:要唔要特別服務 (咁會嘈醒我,堅會鬧爆佢)

住酒店曾經遇過好多激氣事,好似 OT 左幾晚,攰到死,諗住終於可以瞓餐飽上機,點知一早七點幾有人不停拍門,只為問你:請問你有冇衫洗.... 嘈醒就瞓唔番了!!!

同房同事亦試過沖涼時拉開企缸度門,點知成度門甩左出黎。

另外有一次,响床邊跌左隻耳環,想揾之際見床下底有個咬左幾啖,發晒霉既蘋果。

當然,其中亦有好的,但通常最記得既都唔係好事啫 :P

3/15/2012

家居上網服務<下篇>

仲記得我幾個月前提過既 家居上網服務 問題冇?定案了,已安裝香港寛頻,聽日會去PCCW門市 cancel service, 一個月後正式過戶,即將告別用左十幾年的 netvigator 上網服務。

唔知係我磁場問題定點,咩都總有少少阻滯。星期一晚去路邊檔簽單,星期二晚裝,本來一切好順,點知星期二晚九點幾有個師傅打黎話要夜少少,十點半左右,我都 OK 佢話會等,問了大概要裝幾耐,得出答案:半個鐘。

最後,十一點來了兩個小師傅,睇落剛畢業的小朋友,裝到半夜一點仍未成功安裝,由於近日感冒其實一早食左藥,好眼瞓,小師傅唔知出左去邊到裝,忍唔住打比之前聯絡我的師傅,請佢揾番兩個小朋友番黎,如果有問題裝唔倒不如第二日裝過,咁搞唔係辦法。幾分鐘後小師傅回來了,表示部機好似有問題。我問:“咁你整唔整倒?整倒既要整多幾耐?“小師傅答:“可能部機死左,整唔倒”,於是我叫佢地走先,叫香港寛頻整番部機再入屋整啦。

第二日,上午十時多,有位師傅打黎:尋晚唔好意思,搞到咁夜,但希望你唔好投訴,我地外判的,你投訴我地會冇 job 做。其實,我跟本冇諗住投訴,只係之前一晚實在太夜,唔想等。如實對答,師傅話:唔該晒,唔好意思.... 公司會再聯絡你下次裝機時間。

幾分鐘後,再有職員打黎約了今晚裝機,7:00﹣9:00。6:50 收倒電話,師傅表示佢已經到左,屋外既線同機確定冇問題了,等我番去入屋試埋就可以。我7:05 番去,電梯門打開,見倒三個師傅,一個入屋幫我試裝,set 埋 router, 另外兩個中途加入話:前晚搞到咁夜唔好意思.... 成功測試安裝完畢,師傅們離開前比張調查 FORM 我,希望我填晒最滿意 4 分,我都同意地照填了,大家揾食啫。

總之,幾日來接觸既香港寛頻職員或者外判員工態度都超好,反而搞到我好似做左衰人星期二晚唔比佢地裝埋咁,相對於吊高黎賣既 netvigator 態度,落差好大~

AppNavi: The Howling Atelier 呻吟的畫室 (Free)

好似又有鬼既新遊戲~ 但個中文名改得好差!

呢個免費遊戲都幾好玩的,男友於他自己的畫室內被殺,主角女友去畫室時被困,結果有好有壞,詳細見攻略後:










好結果:取出證書後,用𠝹刀檢視白鶴畫的左下角,見進提示及已死的男友遺言,知道誰是殺了男友的真兇。用繩與尖木棒合併,置於窗邊,帶著男友最重要的證書及畫離開,報警去。

壞結果:按畫的最後指示燒了畫及證書,合併繩及尖木棒,從窗邊逃出,但女主角跌死了....原來係殺死男友的真兇所設下的陷阱...

3/11/2012

iphone game: DOOORS (Free)

偶然發現之新遊戲。話係 escape game 又唔太似,反而係智力過關似啲....



Download Link: http://itunes.apple.com/hk/app/dooors-room-escape-game/id490611105?mt=8

Room 1: 點門,直接進入

Room 2: 按門上圖案指示,將電話/儀器 (以下統稱iphone) 45 度角傾斜,紅球跌於左下角後,按 2 號門

Room 3: 傾斜 iphone, 見門右方地下有鎖匙,點鎖匙取得後,用鎖匙於3 號門

Room 4: 點左方吊下的黄色繩,4 號門不停轉動,見黑色部份馬上點擊

Room 5: 點門邊的燈,燈會升起,其中一盞燈下有門柄(我的在最左一枝燈下),取門柄後用於 5號門上

Room 6: 不停開關燈掣,至門上出現五盞綠燈,點 6 號門

Room 7: 依門上圖案,左邊白柱點上 ﹠ 下 點;右邊點中間,點 7 號門

Room 8: 點左邊植物,取紅色圓頭針,用之點 8 號門柄位置再依門上提示向左邊拉

Room 9: 左方圓形不停轉,轉至近門的中間部份會見綠色;計準時間,按右邊圓形令之轉動時圓點露出綠色部份時間與左邊圓形露出綠色部份同時出現,馬上點 9 號門

Room 10: 按門上指示搖iphone, 至門前的火熄了,按火柴,取火柴下的手柄。再將左邊的植物往左邊推,用手柄於植物後,中間圓點的黑點,點門可進入

Room 11: 用工具列中的紅頭針於中間一度門上的黑點,點中間的一度門

Room 12: 啤牌中葵扇,梅花為紅色,紅心,階磚為紅色。12 號門上的標示對應左右兩邊的圓點位置,按兩邊中的圓點會轉色(紅,白,黑),但其中左邊葵扇及紅心均為上下倒轉,所以顏色亦隨之上下倒轉,即:
        黑    12 門    紅
        紅                 白
        紅                 黑

Room 13: 按照13 號門上指示左右搖動 iphone, 左邊火把中取火炬,打開 13 號門,用火炬於蜘蛛網

Room 14: 按照門上指示,將門邊的木塊左至右,從高到低排

Room 15: 屏幕左下角有炸彈,取之再放於 15 號門前,用火炬,門柜外有提示,按提示拉動門左右兩邊的拉繩

Room 16: 照門上提示,將iphone 畫面朝向地下,按門

Room 17: 傾斜 iphone 將畫面中石頭向左移,見電掣,關燈,見牆上提示 ET, 開燈,將左邊鐘較至 11 (Eleven);右邊鐘較至 7 (T 外形)

Room 18: 房中有兩條柱,分別按柱上的紅掣連續兩次,直至其中一邊圓球升至天花板,另一邊同樣操作

Room 19: 拉起左及右邊的 19 號門,按中間圓點至綠色,右邊門上取橙色球。用橙色球於天花板,令天花板的灯變綠色,再關上左右兩邊門,拉上中間的門,可離開

Room 20: 移動左右兩邊的圓形,令左右兩邊的顏色對應反映

Room 21: 將 iphone 面朝地下,調較至兩邊水位與牆邊綠線平衡,將門左至右拉開

Room 22: 打開左邊地板,取放大鏡,用放大鏡於右邊老虎近尾位置,見顏色提示 ﹣ 中間上方放入工具列的橙球後,顏色次序應為 : 綠 黄 紅 橙 黄 紫 紅

Room 23: 將畫面左邊的物件往右移,植物後見一個掣,按下變綠色,將門右至左推開,按門離開

Room 24: 用火炬點左右兩邊火盤,按牆上提示,左至右的繩為 1﹣2﹣3﹣4的話,按 “4 3 2 1 2 3 4”次序拉動繩,門可打開

Room 25: 門上圖案為日本,用放大鏡於日本旗上,見提示“25 62”。將門前的石塊左至右調較至 2 5 6 2

Room 26: 將梯移往左邊,拉下繩,拉動左邊的繩,門不停轉,當見門打開了拉右邊的繩門會停止轉動

Room 27: 依照右邊圖畫出現的顏色將球射入門的口中:黄 藍 紅 綠

Room 28: 將 iphone 向右傾,氣球右移,依畫面指示按 iphone 的音量控制 - + - +, 門打開可離開

Room 29: 畫面右下角有刀,拎起再用刀除去畫面中的植物,分別向左及右兩個方向拉開白色門,右邊門拎鎖匙,用鎖匙打開 29 號門

Room 30: 按動左邊兩隻企鵝至互望位置,再按右邊企鵝至互望位置,門上變綠燈可以打開 30 號門

Room 31: 將 iphone 上下倒轉,牆上綠燈一盞盞著了,至所有變綠燈,可進行 31 號門

Room 32: 將 iphone 右傾,令石頭壓住右邊地上紅掣,用火炬趕走門前密蜂,可入 32 號門

Room 33: 用刀割斷右邊地上的線,依 右 左左左左 右右 次序拉門

Room 34: 將右邊植物移開,用放大鏡見牆上提示,即用 iphone 依照牆上時間方向轉動,完成門上變全綠燈,可進入 34 號門

Room 35: 用火炬點門左右兩邊的火把,牆上出現字母,依照字母數量調較門前的石塊數量,左至右為 6 4 5 6

三十五關完成,遊戲結束,按畫面會增加煙花數量。Enjoy~

Movie: 桃姐 A Simple Life

近期好似冇咩新戲上,結果走去睇左 “桃姐”。

劇情好簡單,桃姐於 Roger 家打工六十多年,服侍一家幾代老幼,由於 Roger 一家移民美國,淨低桃姐與 Roger 於香港生活。一日,桃姐突然中風,Roger 開始發現桃姐响佢生活既重要性,而呢套戲主要交代桃姐中風至去世幾年間與 Roger 既一段介乎主僕與母子間既感情。

戲中葉德嫻應該素顏上陣,動作言語間好配合身份,令人好感受到佢自己身為工人唔想麻煩 Roger 一家,想被愛但唔敢要求太多既無奈。

感受最深反而係桃姐住既老人院一幕,實景拍攝之餘好寫實,同我好多年前家人住老人院時既情景極之相似 ﹣ 任人擺佈卻又無可奈何。

戲中好多知名導演及‘串’星,黄秋生杜汶澤依然搶鏡好笑,桃姐 Roger 間相處都好多笑位之餘都好温馨。

最後,桃姐臨離世時 Roger 決定番大陸做野,唔想面對桃姐離開,覺得佢少少‘自私’但又好明白當中唔敢面對既情感。

死亡於我並唔係陌生既課題,成日覺得老人家要病要受苦既話,‘離開’反而係一種解脫....

iphone game: Draw Something (Free)


iphone free apps 首位,老少皆宜遊戲: Draw Something, 數天內極速於本人的 facebook 頁內進行洗板,而我自己尋晚裝完後都玩左幾個鐘,停唔倒手。

中學畢業之後好多畫畫,最多都係前排玩過數字油畫,而呢個 draw something 係要於遊戲中揾隨機對手或朋友一齊玩,遊戲每一輪會提供一至三星難度既單字題目比玩家,你選擇左個題目,就要開始發揮創意畫畫,可選擇線條粗幼,錯左可以擦走重身黎過。完成按 ‘DONE’,等對手估,估中視乎你當初選既難度可以取得一至三星金幣,估唔倒可以 ‘PASS’,遊戲比答案你,到對手揀字再畫比你估。

遊戲本意大概想玩家只要畫圖案比人估,但眼見不少人將成個答案寫於畫中,咁就唔好玩啦。其實遊戲並唔要求玩家畫得好靚,只要畫出重點比人估倒,但都唔少 ‘畫家’細心畫畫畫,變相另一種畫展~

遊戲本身只有英文,好老實,唔少生字我都唔識,要查字典,可能咁會幫我學英文, haha.

Download link: http://itunes.apple.com/hk/app/draw-something-free/id488628250?mt=8

AppNavi: Remote Escape 搖控逃脫 (Free)

 完全唔記得左有個 game 未寫攻略.... 唔知係咪幾個星期冇玩生疏左,玩左幾個鐘先過倒關 >.<

遊戲中途轉角色交換物品比另一角色換,再次覺得係 ‘抄考 ’Antrim Escape ....

3/09/2012

AppNavi: The Woe that Befalls Me 降臨在我頭上的禍 (Free)

出差大陸半個月,上網都唔得閒,甩晒所有攻略, sorry~

以下係 Agnes & GinSon 提供既攻略,按我收到既時序如下, thank you both of you~~









From Agnes:

From GinSon: